& bi þatt allterr stodenn a33; H 1030
       Þatt follkess hali3domess.
  Þatt wærenn inn an arrke þær;
       Swa summ þe boc uss kiþeþþ.
 & tær abufenn wass a bord; 
       Þatt hali3 bræd wass onne.
  & oferr þatt hall3hede bord;
       Þe33 haffdenn liccness metedd.
  Off cherubyn. & seraphyn.
       Off twe33enn enngleþeode.
  All enngleþeod todæledd iss;
       O ni3henn kinne þeode.
  & cherubyn. & seraphyn;
       Sinndenn þa twe33enn þeode.
  Þatt sinndenn drihhtin allre nest;
       & heh3hesst upp inn heoffne.
  & off þa twe33enn enngleþeod;
       Þe33 haffdenn liccness metedd.
  Abufenn þatt hall3hede bord; 
       Þatt hall3hed bræd wass onne.
 & att te minnstredure wass;
       An allterr þær wiþþ utenn.
  & bi þatt allterr wass þe lac;
       O fele wise 3arrkedd.
  Þurrh preostess alls uss se33þ þe boc; col. 32
       Off aaroness chilldre.
 & o þatt allterr haffdenn þe33.
       Glowennde gledess 3arrkedd.
 & off þatt errfe þatt tær wass
       Drihhtin to lake 3arrkedd;
  Himm toc þe bisscopp off þe blod. H 1070
       Swa summ hiss boc himm tahhte.
  & gledess inn hiss reclefatt.
       He toc þær o þatt allterr.
  & dide recless inn inoh.
       Drihhtin þær wiþþ to þeowtenn.
  A33. whann he shollde ganngenn inn.
       Upp to þatt oþerr allterr.
  Þatt wass a33 æness o þe 3er;
       & a33 himm sellfenn ane.
  Forr mikell þing to tacnenn uss;
       Þatt uss birrþ alle trowwenn.
  He toc þe recless & te blod;
       & 3ede upp to þatt allterr.
  Þatt wass wiþþ innenn wa3herifft;
      Swa summ icc habbe shæwedd.
  & tanne brennde he recless þær.
       To þeowwtenn godd to cweme.
  Swa. – þatt tær wass swa mikell smec.
       Off recless att tatt allterr;
  Þatt all he wass himm sellfenn hidd.
       & lokenn þær wiþþ innenn.
  & toc himm þa þatt illke blod;
       Þatt he þær haffde gre33þedd.
  Þatt blod tatt he þær haffde brohht;
       & warrp itt tær wiþþ strenncless.
  E33whær upp o þatt hall3he bord;
       & e33whær o þatt allterr.
 & siþþenn 3ede he þeþenn ut;
       To strennkenn i þe kirrke. H 1100
  Wiþþ utenn þe33re wa3herifft;
       Swa summ hiss boc himm tahhte.
  & siþþenn comm he till þe follc;
       & wessh himm hise claþess.
  Acc þohh swa þehh he wass all da33;
       Unnclene anan till efenn.